تحية طيبة للجميع :
حقيقة أسعدني كثيرًا خبر الاجتماع الأول لبني كثير اللامية الطائية ، بهذه المناسبة أشارك بهذه القصيدة المتواضعة والتي آمل أن تنال استحسانكم مع الاعتذار المسبق إن كان فيها عيب أو نقصان فهو اجتهاد جاء على عجل وأتممتها أثناء طريقي إلى عفيف ، وأتقبل أي نقد هادف حولها فلست معصومًا من الخطأ :
مرحبا باللي خبرهم يشرح الصدر بجماله = يوم قالوا في عفيف القوم جمعتهم كبيره
من بعد فرقى طويله والشتات أعلن زواله = ابتدت صفحه جديده بالتواصل والنصيره
ملتقى الكثران في يوم الخميس أعلن كماله = يا عسى خير علينا والفرح مسك وعبيره
من قريب ومن بعيد ومن جنوب أليا شماله = من حدود الشرق حتى الغرب مقصدهم ظفيره
الجدود اللي مضوا أمجادهم تحوي رساله = يا عيال اللام يا فرسان فرسان الجزيره
ارفعوا راية تواصل بينكم تقوى حباله = بالموده والمحبه وحّدوا صف العشيره
قوم لام اللي خبرهم يشهد التاريخ حاله = القروم اللي ذكرهم واصلٍ في كل ديره
لو كتبت كتاب عنهم ما كفا وصفي جزاله = أو وصل ميه عددها ما كفت وصفي يسيره
هم سناعيس الكرم أهل المروه والأصاله = هم صروح المجد هم نور الظلام اللي ينيره
هم عضيد اللي نخاهم من وصل يلقى مناله = هم نقاط اللي حروفه حايره من أمر وغيره
هم جنود ما يهابون العدى أهل البساله = يرخصون الروح ما يرضون ذلٍ أو صغيره
الرجال اللي فعايلهم قبل قيل وقاله = الرموز اليا طرو شجعان في قصه وسيره
يا عسى ربي بفضله يجمع الشمل برجاله = بين ضيان الظلام كثران مع فضل ومغيره
ويا عسى ربي يجازي من جمع شمل وسعى له = والشكر موصول للجنه مساعيها كبيره
واختم الأبيات صلى الله على ماحي الجهاله = البشير اللي هدانا خيرة أخيار البشيره
شعر
أبو فيصل الحميزي
يوم قالوا في عفيف القوم جمعتهم كبيره
العرض العادي
المواضيع المتشابهه
